Mga Pinoy'ng atleta midaog og medalya makadawat og dakong cash incentives

CEBU, Philippines — Dakong kuwarta ang madawat sa Pinoy nga mga atleta nga mihakot og mga medalya sa 30th Southeast Asian Games.

Kini human si Presidente Rodrigo Duterte mimando nga pun-an ang cash incentives sa mga atleta nga nidaog og mga medalya.

Gikan sa P600,000, ang tanang gold medalists makadawat na og P850,000, ang mga nakakuha og silver medals hatagan og  P300,000 ug ang bronze medalists mobulsa og P160,000.

Gipahibalo kini sa Malacañang Palace human  nila masayri nga segurado na ang pagsakmit sa Pilipinas sa overall championship sa SEA Games.

Sa maong kalamboan, ang world champion gymnast nga si Carlos Yulo maoy maisip nga labing adunahan sa tanang SEA Games athletes tungod kay moabot sa P3.2 million ang madawat niya nga insentibo.

Si Yulo midaog og duha ka gold medals ug lima ka silvers.

Ang Cebuana nga si Margielyn Didal makadawat og  kapin sa usa ka milyon bugti sa duha niya ka bulawan.

Sa laing bahin, ang surfer nga si Roger Casogay personal nga gipakigkitaan ni Duterte diin gidayeg siya sa presidente human sa bayanihon niyang gibuhat.

Si Casogay nga nakadawat og mga pasidungog wala pa'y labot iyang gold medal sa SEA Games, miluwas sa hapit malumos niyang  kontra.