SWU Cobras pakyas, apan daogan didto sa Bukidnon

CEBU, Philippines — Pakyas man tuod sila sa ilang kampanya sa titulo sa 1st Kibawe Mayor's Cup Open Basketball Tournament niadtong Disyembre 4-8, apan ang Southwestern University (SWU)-Phinma Cobras gibati nga daw sila gihapon maoy kampiyon gumikan sa pagdaog nila sa kasingkasing sa mga fans didto sa  Bukidnon.

Ang Cobras miyukbo ngadto sa Pasig  Sta. Lucia Realtors sa tagakay nilang kampiyonato niadtong Domingo, apan mapasigarbuhon gihapon gumikan sa kasinatian nga ilang nakutlo sa pagkibangga nila batok sa mga banggiitang commercial players gikan sa Maharlika Pilipinas Basketball League (MPBL) atol sa mabungahon nilang biyahe didto sa Kibawe.

"About our game, we achieved our objective of giving more exposure to our bench players while continuously establish the team's ball movement," matud pa ni SWU-Phinma coach Mike Reyes nga mitimon sa Cobras ngadto sa una nilang  Cebu Schools Athletic Foundation, Inc. (CESAFI) title sud sa lima ka tuig human ilang gibihag ang three-time defending champion University of the Visayas (UV) Green Lancers sa miaging bulan.

Apan labaw sa pagpasundayag sa ilang abilidad nga gikalingaw og maayo sa mga nanan-aw, ang Cobras nakamaneho pagpuga sa ilang oras aron mopahigayon og basketball clinic alang sa mga batan-ong basketbolista didto sa silingang lungsod sa Kibawe nga Maramag ubos sa liderato ni Mayor Atty. Jose Joel Pepito Doromal isip kabahin sa ilang community outreach project.

Si tounament organizer Van Halen Parmis nga maoy responsabli sa pagdala sa duha ka top Cebu collegiate teams didto sa Bukidnon, mapasalamaton kaayo sa kaayohan nga gidalit sa Cobras gumikan kay kabahin man kini sa iyang adbokasiya.

"It has always been my advocacy to inspire the young ones, find raw talents, and help nurture them so they eventually become champion athletes one day. I am doing this because of pure passion," matud pa ni Parmis. "I know there are a lot of potentials in Mindanao that just needed to be tapped. Given the right kind of support and exposure, they are capable of excelling even in a bigger stage."