Masterline midemolis sa Pub Gee Resto Bar sa FYA Season 24

CEBU, Philippines – May purohan pa ang Masterline nga makasud sa Top 4 human sa ilang pagdemolis sa Pub Gee Resto Bar, 96-65 sa FYA Basketball League (Season 24) Soontit Construction Cup 2019-2020 niadtong Domingo diha sa Atillo gym sa Punta Princesa, Dakbayan sa Sugbo.

Dominane kaayo ang Masterline sa maong duwa diin ang ilang 24 puntos nga labaw sa halftime, 43-19 gibingat ngdto sa 69-39 human sa tulo ka kuwarter.

Namintinar sa Masterline ang dakong nilang labaw hangtod sa katapusang gutlo sa duwa.

Si Socrates Aglipa mipabuto og 22 puntos, milangkat og lime ka rebounds ug miwitik og unom ka assists nga nakapahimo kaniya nga best player of the game.

Laing tulo ka players ni playing team manager Noel Medalle ang mirehistro og double figures. Si Francis Paracuelles mitikdol og 15 puntos, si Stephen Lumagbas mitimang og 14 puntos, samtang si Giovanni Tandoy mitimbre'g 13 puntos sa Masterline nga aduna na karo'y 3-3 nga baraha.

Upat sab ka player ang migpugnit og double digits sa Pub Gee Resto Bar nga wala pa gyu'y daog sa unom ka duwa.

Gipangulohan kini ni Jaybee Silvano nga mipupo og 19 puntos, gisundan ni Benz Patricio nga adunay 15 puntos. Sila si Isyot Regudo ug team manager Boyet Duran nagkumboya'g 21 puntos sa Pub Gee Resto Bar nga padayong nga nangiwit sa standing.

Sa laing aksiyon, dili na malalis, ang Purefit Gym segurado na molugwa nga No. 1 bisan una pa ang ilang madangatan sa katapusan nilang duwa sa eliminasyon.

Kini human ang Purefit Gym mipilde sa Yoyi's Pastries & Desserts, 117-111.

Mihimo'g double-double performance si Wilson 'Tuko' Gabucan pinaagi sa iyang 31 puntos ug 11 ka assists aron pangulohan ang Purefit Gym. Milangkat sab siya og walo ka rebounds ug duha ka steals aron ilhong best player of the game.

Ang team manager nga si Mclain Alkuino miamot og 22 puntos, si Jim Jim Rara miambit og 17 puntos, samtang si Val Ramirez mihirit og 17 puntos sa Purefit Gym nga maoy nikontrolar sa tibuok duwa.

Sila si Kent Pepitno ug Janry Stella mitampo'g 13 ug 11 puntos matag usa sa Purefit Gym nga aduna na'y 6-0 nga baraha.

Anugon kaayo ang 42 puntos ni Jao Rabado kay  ang Yoyi's Pastries & Desserts nakatilaw sa ikaduha nilang pilde.

Si Reyboy Caballes mitimbre og 24 puntos, samtang sila si Joshua Salvador ug Winnie Mata miabuno'g 12 puntos matag usa sa Yoyi's Pastries & Desserts ikaduha gihapon standing sa ilang 4-2 nga baraha.

Ang liga nahimo pinaagi sa paningkamot sa presidente niining si Dexter Caballero. 

PUNTOS MATAG USA

Unang duwa:

MASTERLINE  (96) – S. Aglipa 22, F. Paracuelles 15, S. Lumagbas  14, G. Tandoy 13, D. Bocado  9,  J. Eriso   8, J. Jabonero   7, J. Engaling   6, K. Cabansan  2.

PUB GEE RESTO BAR  (65) – J. Silvano 19, B. Patricio 15, I. Regudo 11, B. Duran 10, A. Regudo  6, J. Enriquez 4.

Ikaduhang duwa:

PURE FIT GYM  (117) –  W. Gabucan - 31,

M. Alkuino 22, J. Rara 19, V. Ramirez 17, K Pepino 13,  J. Stella 11,  A. Dante  2,  G. Aguilar 2.

YOYI'S PASTRIES & DESSERTS  (111) – J. Rabadon 42, R. Caballes 24, J. Salvador 12, W. Mata12, W. Auditor 8, J. Aglipa 6, R. Canoy 4, V. Lastomen 3.