Team Sagay naghari sa Salon de Rose Tatluhan chessfest

CEBU, Philippines — Giharos og daog sa Team Sagay gikan sa Sagay City, Negros Occidental ang pito nila ka mga duwa aron maghari sa Salon de Rose Tatluhan Chess Tournament niadtong weekend diha sa Barracks Chess Club sa Robinsons Galleria Cebu.

Gitimon nilang International Master Joel Pimentel Jr., Romeo Sadia ug Amalio Bayot, ang Sagaynons mitapos sa perpekto nilang 14.0 match points aron kabihon ang P30,000 nga ganti.

Ang University of San Jose-Recoletos (USJ-R) Jaguars nilang National Master Rogelio Enriquez, Jethro Esplanada ug Patrick Chua mibulsa og P20,000 sa pagpahiluna niini sa ikaduhang dapit bitbit ang 12.0 puntos.

Ang Salon de Rose Team B nilang Cyril Ortega, Mark Nino Mangubat ug Ed Vincent Lepalam ug OK KAAYO nilang Joel Pacuribot, Carlos Moreno III ug Dennis Navales parehong miposte og 11.0 puntos, apan ang Salon de Rose maoy nakadawat sa P10,000 nga ikatulong ganti gumikan sa mas taas niining tie-breaker.

Ang Team Conqueror nilang NM Merben Roque, Prince Rickvil Mella ug Jimboy Almadian, Triple Lima nilang Anthony Makinano, Leo Lofranco ug Robert John Padel, ug JohnArdre nilang Johnny Wellen Carzano, Arje Villarin, ug Andre Cardosa maoy miokupar sa ikalima ngadto sa ikapito nga puwesto uban ang 10.0 puntos matag usa.

Nagkumpleto sa Top 10 nga dunay 9.0 puntos matag usa mao ang Dark Horse nilang Adrian de la Cruz, Junaico Segismar, ug Bernabe Tagulo Jr., ChessBangz2 nilang Bonn Rainauld Tibod, Isaganik Luna Jr. ug Louie Canieso, ug Cebu Strikers nilang Ronald Ganzon, Lemuel Montero, ug Jason Bandal.