Alin Team-A bag-ong kampiyon sa ABCC season 2
CEBU, Philippines — Namunga ang mga paningkamot sa Alin Team-A (Alin Cargo Express Co. Ltd.) dihang ilang gipilde ang Quickserver Customs Brokerage, 82-67 aron maghari sa Aduana Basketball Club Cebu (ABCC) Season 2 Inter-Brokerage Cup 2019 niadtong Martes diha sa CPA gym sa north reclamation area.
Dili hinuon sayon ang nakab-ot nga kadaogan sa Alin Team-A kay miagi pa kini og overtime una nila masakmit ang kampiyonato.
Nangu sa kadaogan si Jimboy Filoteo nga mipugnit og 14 puntos.
Apan si Lyric Into maoy mikawat sa salida nga miwitik og 13 puntos, walo ka assists ug unom ka rebounds nga nakadapit sa organizers pinangulohan nilang Boodee Monteño ug Ryan Barral pagpili kaniya isip Finals MVP. Sila si Chris Perolino ug Jon Abinales nag-amotay'g 12 ug 11 puntos sa Alin Team-A nga gibiyaan og 12 puntos human third period, 43-55.
Nagdanga-danga na unta sa kadaogan ang Quickserver, apan nabaraw dihang takulahaw lang nga nakaigwalis ang Alin Team-A, 65-all hinungdan sa overtime.
Sa dugang singko minutos, padayon nga nagtusak-tusak ang opensa sa Alin Team-A uban ang solidong depensa hinungdan nga igo lang nila gipaiskor og dos puntos ang Quickserver sa overtime.
Ang Quickserver gipangulohan sab ni Genson Antolijao pinaagi sa iyang 14 puntos, gisundan ni Kikoy Castro nga adunay 13 puntos ug Jonnas Cayanong sa iyang 10 puntos.
Sa laing bahin, si Ralph Ecojedo maoy napiling Season MVP ug nalakip sab siya sa Mythical 10 uban nilang Ramil Aniñon, Ian Adonis Jadraque, Alain Tarona, Jerry Singson, Chris Perolino, Daniel Enriquez, Genson Antolijao, Jonnas Cayanong ug Jimboy Filoteo.
Ang mga duwa gidumala ni league commissioner Sidney Ganapin.
PUNTOS MATAG USA
Unang duwa:
HOV/MARTINEZ (70) – Pendang 18, Jadraque 14, Abellana 14, Enriquez 9, B. Medalle 6, Cal 5, Dungog 2.
ROLLWAY/ABAY-ABAY (63) – Tarona 21, Amorin 12, Urbina 6, J. Palad 5, Olloves 4, A. Palad 4, E. Sanchez 4, Abay-Abay 3, Sanchez 2, Yncierto 2.
Ikaduhang duwa:
ALIN TEAM-A (82) – Filoteo 14, Into 13, Perolino 12, Abinales 11, Lleve 8, Villomo 6, Singson 4, Palero 4, Calo 4, Barral 2, Estorgio 2, Quiros 2.
QUICKSERVER (67) – Antolijao 14, Castro 13, Cayanong 10, Bugtai 6, Soco 5, Tacocong 5, Quilantang 4, Cambal 2, Plando 2, Aniñon 1.
- Latest
