Davis mipabuto 50 puntos

CEBU, Philippines —  Mipatuasik og 50 puntos si Anthony Davis aron pangulohan  ang Los Angeles Lakers nga milubong sa Minnesota Timberwolves, 142-125  sa NBA kagahapon didto sa Staples Center sa Los Angeles, California.

Mao kadto ang ikaupat nga higayon nga si Davis mikadlit og 50 puntos sa iyang karera ug labing unang higayon uban sa Lakers.

"One for the ages,"  matud pa ni Lakers coach Frank Vogel agi'g pagdayeg ni Davis nga wa'y sipyat sa 10 niya ka free throws ug midugang sab og pito ka rebounds ug unom ka assists.

"I just came out aggressive, playing hard," matud pa ni Davis.

Wala sab hinuon magpabitin si LeBron James kay  mihipos kinig og 32 puntos ug 13 ka assists bisan og na-foul trouble sa first half. Si Alex Caruso midugang og 16 puntos alang sa Lakers nga miinat sa labing nindot nga rekord karon sa liga ngadto sa 21-3.

Didto sa Miami, si rookie Tyler Herro miiskor og 27 puntos, apil na ang krusyal niyang tres sa nahibilin nga 38.2 segundos sa overtime aron lap-an sa Heat ang Chicago Bulls, 110-105.

Apil sa pagkabayani ni Herro ang iyang 3-pointer sa nahibilin nga 7.1 segundos sa regulasyon nga nakatabla sa iskor, 97-97  hinungdan nga naka-overtime ang pildihunon na untang Heat.

Ang Heat nagpabibiling wa'y pilde sud sa 10 ka duwa didto sa ilang korte ug sa kinatibuk-an nagkupot na karon og 17-6 nga baraha.

Didto sa Dallas, si Luka Doncic mibahog og 27 puntos, pito ka rebounds ug walo ka assists, apan dili kini igo gumikan kay ang Mavericks naparot sa Sacramento Kings, 110-106.

Mao kadto ang ika-19 nga sunod-sunod nga higayon nga si Doncic miposte og dili momenos 20 puntos, lima ka rebounds ug lima ka assists.

Bugtong konsolasyon ni Doncic taliwala sa ilang kapildihan mao nga iyang nalabwan ang record ni NBA legend Michael Jordan sa maong departamento.

Didto sa Washington, ang Los Angeles Clippers mibangon sa makauulaw nilang 28 puntos nga kapildihan sa mga kamot sa Milwaukee Bucks ug gipahimungtan sa ilang kapungot ang Wizards, 135-119.

Si Kawhi Leonard maoy nangu sa Clippers uban ang 34 puntos ug 11 ka rebounds, samtang si Paul George miamot og 27 puntos.