Amit naka-gold sa Women's 9-ball

CEBU, Philippines — Giseguro ni Cebuana pool veteran Rubilen Amit nga motapos sa iyang kampanya sa 30th Southeast Asian Games nga makabitbit og usa ka bulawang medalya.

Kini human siya makabawos sa iyang kababayan nga si Chezka Centeno sa finals sa women's 9-ball kagahapon didto sa kaulohan.

Si Amit nakaangkon na og silver niadtong Sabado sa 10-ball  nga gidominaran ni Centeno, apan kagahapon iya kining nabawsan  sa iskor nga 7-3.

Ang kanhi world champion nga si Amit mihipos  na karon og 12 ka SEAG medals, pito niini mga bulawan.

Usa siya sa sinaligan sa nasud sa maong biennial event tungod sa kanunay niya pagtampo og medalya sukad pa niadtong tuig 2015.

Sila si Centeno ug Amit nagtandem sa 9-ball doubles diin miabante sila sa medal round human gipilde  ang Vietnamese, 7-6.

Gawas sa mga Pinay, midaog usab kagahapon sa preliminaries ang mga betaranong sila si Warren Kiamco, Dennis Orcollo ug Jeffrey Roda.