Coach Fizdale gipalagpot sa Knicks

CEBU, Philippines — Gipalagpot sa New York Knicks ang ilang head coach nga si David Fizdale kagahapon human sila mapilde sa ikaduhang sunod-sunod nga higayon. 

Kini nakapainat sa ilang sagunson nga pilde ngadto sa walo ka duwa.

"Today, head coach David Fizdale and assistant coach Keith Smart were relieved of their coaching duties," sigun pa sa Knicks sa opisyal niining pamahayag.

Isip hulip nilang Fizdale ug Smart, gitudlo sa Knicks ang usa nila ka assistant coach nga si Mike Miller isip temporaryo nilang coach. Nagtakilid nang daan ang sitwasyon ni Fizdala human ang Knicks nangiwit sa Eastern Conference uban ang 4-18 record nga maoy ikaduhang labing bati sa liga niini nga season.

Niadtong Biyernes, ang Knicks gipakauwawan sa Denver Nuggets, 129-92 didto sa ilang korte. Tulo ka adlaw sa wala pa kadto mahitabo, ang Knicks gikuso-kuso sab og 44 puntos sa Milwaukee Bucks.

Sa duha niya ka seasons sa Knicks, si Fizdale nakakolekta lamang og 21 ka daog nga giatbangan og 83 ka pilde.

Duha ka tuig ang milabay, si Fizdale gipakabwit sab sa Memphis Grizzlies human sila masagunsoni og walo ka pilde.