Didal, Watanabe naka-gold ni

CEBU, Philippines – Duha ka Sugboanang atleta nga sila Margielyn  Didal ug Kiyome Watanabe ang mihakot og bulawan alang sa Pilipinas sa 30th Southeast Asian Games kagahapon.

Mao kini ang labing unang gold ni Didal sa SEA Games human niya gipilde ang kababayan niyang si Christiana Means sa finals sa women's skateboarding event kagahapon didto sa Sigtuna Hall sa Tagaytay.

Sa maong kadaogan, si Didal mausa sa mga maihap nga atleta sa Pilipinas nga adunay gold medal sa Asian Games ug SEA Games. 

Ang garbo sa Barangay Lahug nga si Didal mipasundayag og mga tricks ug stunt nga wala masunod ni Means, kinsa kontento ra sa iyang silver medal finish.

Sa iyang bahin, ang judoka nga si Watanabe milabni sa ikaupat nga sunod-sunod niyang gold medal sa SEA Games human nidominar sa  63 kgs. weight division.

Gilauman na nga makuha ni Watanabe ang gold, apan labing mahinungdanon nga makatabang ang iyang kalampusan sa pagkandado sa iyang luna sa 2020 Tokyo Olympics.

Sa laing bahin, ang Fil-German nga si Daniel Lederman misakmit sab og gold medal pinaagi sa sa men's class.

Si Ledermann, kansang inahan usa ka Sugboana, mipilde ni Basral Hutomo sa Indonesia sa finals.

Ang gold medals sa skateboarding gisubli usab ni Jermyn Prado nga nanghawod sa road event sa cycling. Midaog usab ang Team Philippines sa modern pentathlon, samtang ang laing Cebuano nga si Nestor Dinopol mitampo og silver medal sa shooting.

Bronze medalist usab ang Pilipinas sa team mixed relay sa duathlon.