30th SEA Games Cebuanos misidlak dayon

CEBU, Philippines — Mipakita dayon sa ilang ka maayong laki ang mga Sugbuanong atleta human sila mihakot og medalya alang sa nasud sa unang adlaw sa 30th Southeast Asian Games kagahapon.

Ang arnisador nga si Dexler Bolambao maoy unang stick fighter nga nakabingwit og bulawan human niya gilatos si Soc Paing sa Myanmar atol sa men’s bantamweight full contact finals.

Laing naka-gold medal mao ang tandem nila ni Pearl Marie Caneda ug Wilbert Aunzo kinsa mihakot og tulo ka gold medals sa dancesport competition didto sa Royce Hotel sa Clark, Pampanga.

Ang duha midominar sa latin samba category, latin cha cha ug rumba diin pulos nila gipangbiyaan sa puntos ilang mga kaatbang.

Nakabingwit usab og bulawan sila si Metodio Suico ug Jane Marie Sucalit kinsa kabahin sa national team sa hoops takraw nga midominar sa ilang event.

Samtang sa triathlon, ang batan-on ug taga-Talisay nga si Kim Remolino maoy mihatud sa labing unang silver medal sa nasud.

Tam-is ang kadaogan alang sa Philippine team tungod kay nagsunod si Remolino sa laing Pinoy triathlete nga si John Chicano kinsa maoy gold medalist.

Si Chicano maoy labing paspas sa oras nga 1:53:26, samtang nagsunod kaniya si Remolino sa oras nga 1:55:03.

Mitampo usab og silver medal ang veteran Cebuano cyclist nga si Nino Surban sa cross-country mountain bike race.