Holland mipasalig og daog sa beermen

CEBU, Philippines — Gipasalig sa bag-ong import sa San Miguel Beermen nga si John Holland nga magpabiling buhi  ilang tsansa alang sa kampiyonato sa PBA Governors' Cup karon.

Si Holland nga maoy replacement import sa Beermen human ma-injured ang high-scoring nga si Dez Wells, masaligon nga dili pa sila mataktak karon sa ilang sangka batok sa Barangay Ginebra Kings sa alas-7 sa gabii didto sa Smart Araneta Coliseum.

Ang Ginebra nga adunay twice-to-beat advantage mosuway pagpapha sa ilang igsuong koponan nga San Miguel.

Sa dili pa ang ilang duwa, magsangka una ang Meralco Bolts ug Alaska Aces sa alas-4:30 sa hapon.

Nakuwestiyon karon ang katakus sa San Miguel nga makabalik sa finals ug masakmit ang gihandum nila nga grandslam title kay misamot sila kapiang tungod sa pagkasuspenso nilang Arwind Santos, Kelly Nabong ug Ronald Tubid.

Gisuspenso ang tulo kay nag-unay og sukmagay atol sa ilang team practice niadtong miaging semana.

Bisan pa niini, si Holland positibo nga modaog sila karon batok sa Ginebra.