Blazers debut ni Melo gibaraw sa Pelicans

CEBU, Philippines — Sa labing unang higayon sud sa usa ka tuig, si Camelo Anthony nakaduwa na og balik sa NBA, ning higayona sul-ot ang uniporme sa Portland Trail Blazers.

Apan nabaraw ang unang salida ni Anthony sa bag-o niyang teams human ang Blazers napilda ngadto sa New Orleans Pelicans sa iskor nga 115-104 kagahapon didto sa Smoothie King Arena s New Orleans, Lousiana.

Si Anthony mitapos uban ang 10 puntos alang sa Blazers nga napiangan kay wala makaduwa ang topscorer nilang si Damian Lillard gumikan kay dunay dili maayong gipamati sa iyang likod.

Bisan pa man og sila naparot, si Anthony gibati gihapon og tumang kalipay nga nakabalik na siya og duwa human siya gitaktak sa Houston Rockets niadtong Nobiyembre 2018.

"It felt great just to be back into the flow of the game, be back on the court, be back to where I think I belong,"  matud  pa ni Anthony.

Si Jrue Holiday maoy nangu sa Pelicans uban ang 22 puntos ug 10 ka assists, samtang si Brandon Ingram mikadlit og 21 puntos sa iyang pagbalik human makapalta og upat ka duwa.

Si C.J. McCollum mihipos og 22 puntos ug si Hassan Whiteside mikolekta og 14 puntos ug 14 ka rebounds alang sa pilderong Blazers.