Beermen batok katropa

CEBU, Philippines — Gawas nga krusyal ang daog tali sa TNT KaTropa ug San Miguel  alang sa ilang tsansa sa twice-to-beat advantage, adunay laing tutukan ang mga fans sa habig sa Beermen.

Kini tungod kay ang Beermen bag-o lang gihamok sa kontrobersiya tungod sa pagsukmagay sa upat nila ka players atol sa ilang team practice.

Ang Beermen makigsangka sa KaTropa sa alas-7 sa gabii human sa lahugay sa NLEX Road Warriors ug Alaska Aces nga gikatakdang sugdan sa-4:30 sa hapon didto sa Ynares Center.

Kahinumduman, nga  nagkagubot  ang kampo sa Beermen niadtong Domingo  dihang nag- sinukmagay sila si Arwind Santos ug import Dez Wells ug naamong sila si Ronald Tubid ug Kelly Nabong.

Pabiling tak-om ang  SMB officials kabahin sa maong mga players.

Sa maong nahitabo,  giiatngan kon makaapekto ba kini sa ilang duwa batok sa lig-ong koponan sama sa TNT. Ang TNT (7-3) mosuway pagkandado sa No. 3 seed ug twice-to-beat advantage, samtang ang San Miguel (6-4) maningkamot nga modaog aron mailog ang ikaupat nga dapit gikan sa Barangay Ginebra.