Alab Pilipinas nauwawan sa ilang opener batok Mono Vampire

CEBU, Philippines — Imbes ipakita nga seryoso siya nga makuha ang kampiyonato sa ABL karon nga season, ang Alab Pilipinas gisugat hinuon og ngil-ad nga  kapildihan ngadto sa  Mono Vampire Thailand, 76-111 didto sa Stadium 29 sa Nonthaburi, Thailand.

Ang Alab  miduwa nga wala ilang mga  sinaligan nga sila si Ray Parks Jr. ug import Renaldo Balkman, nagsalimuang sa ilang opensa nga miresulta sa maong makauuwaw nga kapildihan .

Wala kaugpo ang Alab sa ataki ni kanhi PBA import Mike Singletary nga maoy mibida alang sa Thailand. Si Singletary mirehistro og 19 puntos ug 11 ka rebounds. Namuntos usab sila si Moses Morgan ug Tyler Lamb nga adunay 16 ug 13.

Ang mihulip ni Balkman isip import nga si Nick King adunay 21 puntos, apan kulang kini aron mapadaog niya ang ang Alab. Wala usab kahimo bisan usa ka punto ang Fil-American nga si Jason Brickman nga usa sa mga hinungdan sa ilang kapildihan. Ang Alab mosuway og bangon karong Nobiyembre 27 batok Macau Wolf Warriors.