PBA Legends moduwa sa Danao

CEBU, Philippines — Usa ka tropa sa kanhi ug aktibong mga PBA players ang motaak  didto sa Dakbayan sa Danao alang sa usa ka exhibition game batok sa three-time Cebu Schools Athletic Foundation, Inc. (CESAFI) defending champion University of the Visayas (UV) Green Lancers karong Sabado, Nobiyembre 23 didto sa Danao Sports and Civic Center.

Mga ex-pro stars nga naglangkob sa PBA Legends nga sila si John Ferriols, Willie Miller, Gary David, Lordy Tugade ug Sunday Salvacion makig-alyansa nilang Paul Desiderio, Brian Heruela ug Mac Belo sa Blackwater Elite sa ilang pakigsangka batok sa labing hait nga collegiate ballclub gawas sa Metro Manila.

Mopalig-on sa ilang puwersa mao ang tulo ka college varsity nga sila si Jessie Aloro, JC Escalona ug John Jabonete.

Ang mga tiket nagkantidad og P100 sa upper box, P200 sa lower box ug P250 sa VIP section.

Ang maong pasundayag sa PBA Legends gituyo aron pagdugang og lamas sa Chauncey Open Basketball League 2019 nga gikatakdang mosikad karong Domingo, Nobiyembre 24  didto sa Mayor Panphil B. Frasco Sports Memorial Complex sa Liloan, Cebu.

Si tournament organizer Tyrone Anthony Bayle nga mao sab ang commissioner sa liga, nagkanayon sa usa ka press conference kagahapon diha sa Sunburst-Mango nga siyam ka teams ang kompirmadong mosalmot sa tulo ka semana nga torneyo nga mogahin og dul-an P200,000 nga ganting salapi sa mga mananaog.

Kini mao ang Kyrie Dave nga maoy first runner-up sa  bag-o lang natapos nga Carcar City Mayor's Cup, KCS, SPI Bogo LGU, Fighter 50, San Remigio Properties, Good Harvest, Jie Espina ug Lapu-Lapu Aguila.   

Bahinon sila sa duha ka tag-upat ka grupo. Ang top 2 teams matag bracket human sa single round robin elimination moabante sa crossover semifinals. Ang mga mananaog maoy mag-ilog sa titulo.

Matud pa ni deputy commissioner Edsel Say Vallena, nga mao sab ang head coach sa Cebu Institute of Technology-University (CIT-U) Wildcats, nga ang makampiyon mobulsa og P100,000 samtang ang mopahiluna sa ikaduha ug ikatulong dapit makadawat og P50,000 ug 20,000. Alang sa dugang detalye, kadtong mga interesado mahimong mobisita sa ilang Chauncey Basketball League 2019 Facebook page.