ABCC Season 2 Inter-Brokerage Cup 2019 Quarterfinals banatan karong gabii

CEBU, Philippines — Pulos nangambisyon nga makasulod sa semifinals, seguradong huego-todo nga duwa ang mahitabo sa upat ka koponan nga magbangga sa crossover quarterfinals karong gabii sa Aduana Basketball Club Cebu (ABCC) Season 2 Inter-Brokerage Cup 2019 diha sa Cebu Port Authority (CPA) gym.

Ang Hov/Martinez Customs Brokerage ug ang Quickserver maoy makapabor sa ilang duwa kay armado man kini og 'twice-to-beat' advantage batok sa tagsa-tagsa nilang mga kaatbang.

Ang 1A Hov/Martinez nga miharos sa tanang unom nila ka duwa sa eliminasyon, moharong sa 4B Cutarra Customs Brokerage nga adunay 3-3 record sa alas-6 sa gabii, samtang ang 2B Quickserver nga nagbitbit og 5-1 nga baraha makigbatok sa 3A Portmen nga nagtangag og 4-2 win-loss record sa alas-7 sa gabii.

Masaligon ang Hov/Martinez nga kausahon ra nila ang Cutarra kay aduna sila'y kasandigang tirador nga sila si Wendell Rollon, Glen Pendadng, Jaymar Elloren, Ian Jadraque ug Baeng Medalle.

Nagkinahanglan hinuon sila sa suporta sa uban nilang teammates sama nilang Ramel Enriquez, Rex Bensi, Jim Villa ug Anthony Shaun Cal aron matuman ang gihandum nilang luna sa semis.

Apan dili angay nga mokompiyansa ang Hov/Martinez kay gipangandaman og maayo sa Cutarra ang maong duwa uban ang paglaum nga modaog.

Ang Cutarra ni playing team owner Rocel Cutarra maghangad sa abilidad nilang Francis Eri, Ralph Ecojedo, Allen Tiro, Marc Santiago ug Jerald Abrenilla. 

Moabag sab sa opensa silang Lloyd Rondobio, Lemuel Jarapan, Benjie Arreglo, Jonafer Robledo ug Gemar Arnoco.

Sa laing bahin, ang Quickserver laraw sab nga tagakon dayon nila ang Portmen aron dili mabutang sa delikadong sitwasyon.

 Itugyan ni playing coach Bruce 'The Captain' Inopiquez ang iyang pagsalig ngadto nilang Jonnas Cayanong, Rashid Tacocong, Genson Antolijao ug Kikoy Castro. Makalaum sab ang Quickserver nilang Ramel Aniñon, Jiffrey Inhambre ug Alex Plando.

Samtang ang Portmen magsalig sa katakus nilang Jaypee Maunes, Perry Niones ug Victor Taborada. Andam sab nga mosuporta sa opensa silang Boodee Monteño, Chelsea Niones, Mark Rodriguez,  Reggie Redigor, Jay Oyao ug Ronan Cañete. 

Ang mga duwa ubos sa superbisyon ni league commissioner Sidney Ganapin.