Rambol sa SMB players susihon

CEBU, Philippines — Mohimo og imbestigasyon ang PBA Commissioner's office kabahin sa gikatahong kagubot tali sa mga magduduwasa San Miguel Beermen atol sa ilang team practice niadtong Domingo.

Nalambigit sa giingon rambol mao sila si Arwind Santos, import Dez Wells, Ronald Tubid ug Kelly Nabong.

Gikataho nga unang nagkainitay  si  Wells ug si Santos dihang gidasmagan og kusog sa nauwahi ang import atol sa usa ka play. Wala makauyon si Wells sa gipakitang kapisikal ni Santos kaniya hinungdan nga iya kining gihamag.

Naapil si Tubid human kini milaban ni Santos ug misukmag ni Wells, samtang si Nabong mibawos ug gisukmag si Tubid.

Si PBA Commissioner Willie Marcial mikompirmar sa The Philippine Star nga naabot na sa iyang opisina ang balita ug iya kining sutaon.

Kon mapamatud-an, dili magpanuko si Marcial sa pagpahamtang og silot sa maong mga magduduwa.