NBTC-North Cebu Leg: Upat ka teams pabiling nagbarog
CEBU, Philippines — Human sa ikaupat ka adlaw nga kumbati, upat ka teams, tulo gikan sa publikong tunghaan, ang pabiling nagbarog ug dunay tsansa nga makampiyon sa labing unang Northern Cebu leg sa 13th Chooks-to-Go SM National Basketball Training Center (NBTC) League didto sa D.M. Reynes gymnasium sa Compostela, Cebu.
Kini mao ang Compostela National High School, Lataban NHS sa Liloan, Carmen NHS, ug Rosemont Hills Montessori College, abg bugtong semifinalist gikan sa pribadong tunghaan.
Gitak-op sa Compostela NHS ang ilang kampanya sa eliminasyon pinaagi sa pagposte og duha ka sagunson nga daog batok sa Rosemont Hills, 78-70, ug Liloan NHS, 91-71.
Nagpabilin pa hinoong buhi ang Rosemont human ang Green Rose Centre for Academe, 83-68.
Wala sab magpa-alkansi ang Carmen NHS nga mikastigo sa Lataban, 92-73, ug Arcelo Memorial NHS (day class), 112-61.
Naka-angkon pa hinoon gihapon og luna sa Final 4 ang Lataban human ilang gibugha ang Cabangahan NHS, 102-91.
Sa semis, ang Compostela makigtige sa Lataban samtang ang Carmen makigsangka sa Rosemont Hills. Ang mga mananog maoy mag-ilog sa titulo sa usa ka knockout match.
Ang makampiyon ning lima ka adlaw nga torneyo ubos sa superbisyon ni commissioner Ruben “Junjun” Nelmida Patotoy ug gipaluyohan sa SM, Chooks-to-Go, Vivo, Smart, Darlington-Exped, SBP,Phoenix, Go for Gold, Molten, Gatorade, ESPN5, Cignal ug Compostela LGU maoy morepresentar sa Northern Cebu sa SM NBTC League Regional Finals sunod tuig didto sa Bohol.
- Latest