CESAFI finals na!: Lancers, Cobras mabuhi ang panagkaribal

CEBU, Philippines — Buhion sa University of the Visayas (UV) Green Lancers ug Southwestern University (SWU)-Phinma Cobras ang mainit ug dumot nilang panagkaribal gumikan kay magsangka na sila sa Game 1 sa best-of-three seniors division finals sa 19th Cebu Schools Athletic Foundation, Inc. (CESAFI) men’s basketball tournament karong adawa diha sa Cebu Coliseum.

Gipahibawo ni CESAFI commissioner Felix “Boy” O. Tiukinhoy Jr. nga ang general admission section libre alang sa mga estudaynte sa mga tunghaan nga sakop sa liga. Ipakita lamang ang ilang school ID aron sila makasud nga way bayad.

Magbugno ang Lancers ug Cobras sa alas 6:45 sa gabii human sugdan sa University of Cebu (UC) Baby Webmasters ug Sacred Heart School-Ateneo de Cebu (SHS-AdC) Magis Eagles ang kaugalingon nilang sere alang sa korona sa juniors division sa alas 5:15 sa hapon.

Ang Cobras, ubos sa mando ni coach Mike Reyes, miabante sa finals sa labing unang higayon sukad niadtong 2014 human gitagak ang University of San Carlos (USC) Warriors samtang ang Green Lancersni coach Gary Cortes mipatikangkang sa twice-to-beat UC Webmasters aron lukaton ang katapusang ticket sa kampiyonato.

Mao kini ang labing una nilang panag-abot sa sa finals sa CESAFE regular season sukad niadtong 2013 diin ang Lancers madasigon nga mibangon human mabiyai og 0-2 sa serye dayon na ngadto sa pagpatikyaob sa Cobras sa Game 5 aron labnihon ang ika-10 nklang titulo sukad niadtong 2001.

Ang managkaribal mao say nag-abot sa Partner’s Cup finals ning tuiga diin gi-sweep sa Cobras ang Lancers.  

Ning regular season, gibahin nila ang ilang mga duwa sa duha ka hugna nga elimninasyon. Ang UV mipatilaw sa SWU sa labing una niining pilde, 71-66, niadtong Septiembre 26 apan ang Cobras miresbak, 70-67, niadtong Nobiembre 5.

Sa tinguha nga putlon ang lima ka tuig nilang huwaw sa korona, ang Cobras magsandig nilang Lamine Thiam, Shaquille Imperial, William Polican, Dyl Roncal, Red Cachuela ug Gerald Fernandez.

Samtang ang Lancers nga naglaraw nga inaton ang ilang paghari sa liga ngadto sa upat ka tuig maglaum nilang Lass Coulibally, Monic Soliva, Jancork Cabahug, Michael Maestre, Ted Saga ug sa tulo ka mangtas nilang guards nga sila si Sheldon Gahi, Gileant Delator ug Gabriel Cometa.        

Sa juniors finals, misyon sa Baby Webmasters ni coach Brad Samonte mao ang pagkulit sa labing unang back-to-back championships sa kasaysayan sa ilang tunghaan.        

Dili hinoon sayon nga tahas ang sagubangon sa Baby Webmasters batok sa Magis Eagles nga miparot kanila, 65-62, niadtong Noviembre 9.

Ang Baby Webmasters, nga mitaak sa finals sa ikaupat nga sunod-sunod nga higayon, pagabidahan nilangIsaiah Blanco, King Balaga, Maczi Micutuan, Kenvon Pondoc, Eldiebrando Sevillejo, ug Allen Gako.

Sa habig sa Magis Eagles, ilang mga pambato mao sila si LA Casinillo, Mike Boniel, Ariel Dinglasan, Raffy Celis, ug Raymark Narbasa.