Harden pabiling init

CEBU, Philippines — Padayong nagdilaab ang opensa ni James Harden human kini mirakrak og 49 puntos aron pangulohan ang Houston Rockets ngadto sa 125-105 nga demolisyon sa Minnesota Timberwolves sa NBA kagahapong adlawa didto sa Target Center sa Minneapolis, Minnesota.

Si Harden, nga miposa og walo sa tres, mipupo sab og unom ka assists ug lima ka rebounds sud sa 39 minutos niining pagbabad sa korte alang sa Rockets nga miposte sa ikapito nilang sagunson nga daog.

Mao kadto ang ikalimang higayon sa miagi nilang pito ka duwa diin si Harden mipabuto og dili mominus 40 puntos.        

“We wanted to come here and win this game and we showed them,” matud pa ni Harden.

Si Ben McLemore miamot og 21 puntos, apil na ang duha ka free throws nga maoy nakahatag sa Rockets sa labing una nilang double-digit nga labaw, 89-79, sa nahibilin nga 1:29 sa ikatulong kuwarter.

Sila si Austin Rivers ug Chris Clemons nagparamdam sab uban ang 19 puntos matag usa samtang si Isaiah Hartenstein milangkat og 16 ka rebounds alang sa Rockets.

Si Karl-Anthony Towns maoy nangu sa pilderong Wolves ubaN ang 27 puntos ug 15 ka rebounds.

Sa laing duwa, si reigning MVP Giannis Antetokounmpo mikadlit og 26 puntos ug 13 ka rebounds sa dihang ang Milwaukee Bucks mipatigbabaw batok sa Indiana Pacers, 102-83, sa gubat tali sa mga lider sa Central Division.

Dako sab og natampo si Brook Lopez nga mitali og 15 puntos, walo ka rebounds ug lima blocks alang sa Bucks nga midaog kapito sa katapusan nilang walo ka duwa.