Ancajas adunay bag-ong challenger

CEBU, Philippines — Ang beterano nga si Miguel Gonzales sa Chile ang ginganlan nga bag-ong challenger ni IBF super flyweight champion Jerwin Ancajas sa Disyembre 7 didto sa California.

Ang 30-anyos nga Chilean boxer giisip nga lig-ong kaatbang alang sa Pinoy boxing champion tungod kay kini ang nagkupot sa WBA Fedelatin super flyweight belt.

Sama ni Ancajas, dili usab kabintahaan ang kasinatian ni Gonzales nga adunay rekord nga 31-2, 8KOs.

Hinuon, kon itandi sa rekord ni Ancajas (31-1, 21KOs) makita nga dili kaayo hilig og knockout ang mosunod niyang kaatbang. Si Gonzales maoy mihulip sa unang challenger ni Ancajas nga si Jonathan Rodriguez sa Mexico. Si Ancajas makigsangka na unta ni Rodriguez niadtong Nobiyembre 2, apan wala kini mahinayon human wala gipasud sa Estados Unidos ang Mehikano tungod sa problema sa visa.

Ang trainer ni Ancajas nga si Joven Jimenez mipasalig nga dili maglisud pag-adjust sa bag-ong kontra iyang batos tungod kay padayon kining  nag-training didto sa California.