Luna sa quarterfinals giapas sa Columbian Dyip
CEBU, Philippines – Mahinungdanong daog ang giapas sa Columbian Dyip sa sangka nila batok sa Barangay Ginebra karong gabii didto sa Smart Araneta Coliseum.
Ang Columbian ug Ginebra mag-abot sa alas-6:45 sa gabii human sa duwa tali sa Phoenix Fuel Masters ug Blackwater Elite nga sugdan sa alas-4:30 sa hapon.
Ang Dyip nga kanunay lang mangiwit sa standing sa miaging mga seasons, may kahigayonan nga makasulod sa playoffs ilabi na nga anaa sila sa ikapitong dapit bitbit ang 4-6 nga baraha.
Ang kadaogan karon maoy mokandado kanila sa maong luna, apan kinahanglan una nila nga sagubangon ang hagit sa Ginebra.
Usa ka surprisa ang gibuhat sa Columbian sa Governors Cup ilabi na nga walay magdahum nga makabingwit sila og mga dagkong daog aron mohimo kanila nga playoff contender.
Si Columbian coach John Cardel mipahimangno sa iyang mga batos kon unsa ka krusyal nga modaog sila batok sa Ginebra karon. "If we win against Ginebra, pasok na kami sa quarterfinals. But if we play yung nangyari kanina versus Ginebra and the knockout game for the last quarters berth, wala pa din mangyayari," matud ni Cardel sa PBA.com.
Kon mapilde, ang Columbian posible pa nga maapsan sa Alaska Aces (4-6) ug sa NorthPort Batang Pier (3-6).
Sa ilang bahin, ang Ginebra (6-3) gusto usab modaog aron maseguro nga dili na sila maibot sa ikaupat nga dapit sa standing.
- Latest
