Lakers kabawi dayon
CEBU, Philippines – Human maputol ang ilang nagkutay nga daog, ang Los Angeles Lakers daling mibangon ug gipabugnaw ang Phoenix Suns, 123-115 sa duwa nila sa NBA kagahapon didto sa Talkstick Resort Arena sa Phoenix, Arizona.
Ang All-Star center nga si Anthony Davis mirehistro og double-double nga 24 puntos ug 12 ka rebounds, samtang ang shooter nga si Kyle Kuzma miiskor og 23 alang sa Lakers nga nagpabilin sa unang dapit sa Western Conference Division sa record nga 8-2.
Kini ang labing nindot nga rekord sa Lakers sa sayong bahin sa season sukad niadtong tuig 2010. Si LeBron James mihimo sab og 19 puntos ug 11 ka assists.
Naglabaw og dako ang Lakers sa nag-unang tulo ka kuwarter sa wala pa miaksiyon og sikit Suns nga misikit, 111-113 sa katapusang kuwatro minutos. Nagpabilin hinuon nga kalmado ang Lakers ug mipasud og sunod-sunod nga tres sila si James ug Kuzma aron hingpit nga ikandado ang daog.
Nangulo sa Suns si Ricky Rubio nga adunay 21 puntos.
Didto sa Denver, Colorado, ang batan-ong si Trae Young mikulit og season-high 42 puntos aron tabangan ang Atlanta Hawks nga makahimo og upset nga kadaogan batok sa host team nga Nuggets sa iskor nga 125-121.
Laing rekord usab ang gihimo sa rookie sa Chicago Bulls nga si Coby White human mipatuasik og tulo ka three-pointers sa fourth period aron ihatod ang iyang koponan ngadto sa 120-102 nga kadaogan batok sa nagkagidlay nga New York Knicks.
Sa ubang mga duwa, ang Indiana Pacers mipahilom sa Oklahoma City Thunder, 111-85, gipatapsingan sa Philadelphia 76ers ang Cleveland Cavaliers, 98-97, gipilde sa Miami Heat ang Detroit Pistons, 117-108, samtang ang Utah Jazz mikunis-kunis sa Brooklyn Nets, 119-114.
- Latest
