Kawhi bida sa Clippers batok ex-team raptors

CEBU, Philippines – Miiskor si Lou Williams og 21 samtang si Kawhi Leonard kuwang na lang og usa ka assist aron maka-triple double sa dihang gibugha sa Los Angeles Clippers ang kanhi niya team nga Toronto Raptors, 98-88, sa NBA kagahapon didto sa Staples Center sa Los Angeles, California.

Si Leonard mihipos og 12 puntos, 11 ka rebounds ug siyam ka assists alang sa Clippers. Sa miaging season, iyang gi-aswat ang Raptors ngadto sa makasaysayanon niining kampiyonato diin siya mi-average og 30.5 puntos ug 9.1 rebounds matag duwa sa post-season aron langkaton ang ikaduha niyang Finals MVP award.

Si Pascal Siakam miposte og 16 puntos ug 10 ka rebounds samtang sila si Norman Powell ug Fred VanVleet nagkumboya og 29 puntos alang sa Raptors, kansang tulo ka sagunson nga daog naputol.

Didto sa Boston, si Kemba Walker mirehistro og 29 puntos apil na ang tulo ka krusyal nga mga tres sa katapusang kuwarter samtang si Jaylen Brown mipupo og 25 puntos ug 11 ka rebounds aron pangulohan ang Celtics ngadto sa 116-96 nga pagpakaging sa Dallas Mavericks.

Sa uban pang mga duwa, si Rudy Gobert mikimada og 25 puntos ug 14 ka rebounds sa dihang gikastigo sa Utah Jazz ang Golden State Warriors, 122-108, samtang si James Harden mipabuto og 39 puntos apil na ang 13 ka sagunson nga puntos sa katapusang kuwarter aron pagtuboy sa Houston Rockets ngadto sa 122-116 nga kadaogan batok sa New Orleans Pelicans.

Mikuha sab og atensiyon sila si Donovan Mitchell ug Mike Conley nga nagkumboya og 45 puntos alang sa Jazz nga nagbitbit na karon og 7-3 record.

Sa pikas bahin, si Harden nakaangkon og igong suporta ni Russell Westbrook nga mitimbre og 26 puntos. Si Clint Capela mitampo og 11 puntos ug 20 ka rebounds alang sa Rockets nga mikulit sa ikaupat nilang sagunson nga daog.