Lataban, Carmen NHS 2-0 na sa NBTC-North Cebu leg
CEBU, Philippines — Gimasaker sa Lataban National High School ug Carmen NHS ang ilang mga kaatbang alang sa ikaduha nilang sagunson nga daog sa labing unang Northern Cebu leg sa 13th Chooks-to-Go SM National Basketball Training Center (NBTC) League niadtong weekend didto sa D.M. Reynes Gymnasium sa Compostela, Cebu.
Sila si Justine Noval ug Harvey Salundaguit nagkumboya og 33 puntos sa dihang gilampaso sa Lataban NHS ang St. Louisse Academy, 101-36, samtang si Ivan Martel miiskor og 21 ug si Stephen John Bejoc midugang og 18 puntos sa dihang gilampornas sa Carmen NHS ang Britech College, 106-64.
Ang Compostela ug Cabangahan NHS nagpabilin sab nga way pilde sud sa duha ka duwa.
Si John Michael Pilapil mitagak og 26 puntos ug si Joseph Wagas mipuntos og16 sa dihang giwani sa Compostela ang GreenRose Centre for Academe, 86-83, samtang si Adrian Jay mipabuto og 29 puntos ug si Aldrin Duran midonar og 16 aron pangulohan ang Cabangahan ngadto sa 95-75 nga demolisyon sa Arcelo Memorial NHS (night class).
Dali hinoon nga nakabawi ang GreenRose ug gipahimungtan niini sa ilang kayugot ang Liloan NHS Extension-Don Bosco Campus, 92-82.
Si Earl Jethro Tautho mipatuasik og 35 puntos samtang si John Patrek Cardosa mitipig og 19 puntos alang sa GreenRose nga nagkupot na karon og 2-1 nga baraha.
Wa sab hinoon naminghoy sa hingpit ang Don Bosco gumikan kay ila mang gibatil og kulata ang Santa Cruz Learning Center, 114-36, luyo sa 43 puntos nga salida ni Jay Michael Galicia.
Sa uban pang mga resulta, ang Rosemont Hills Montessori College mipaksit sa La Consolacion College (LCC)-Liloan, 74-54, ang Arcelo (day class) mirehistro og duha ka sunod-sunod nga daog batok sa Schildknecht School, 74-69, ug St. Louisse Academy, 87-41, samtang ang Liloan NHS mikulating sa Formative Academic & Skills Development School, 95-71.
- Latest
