SWU, UC Jrs. Finals ang tuyo mga duwa

CEBU, Philippines —  Luna sa finals maoy tuyo sa Southwestern University (SWU)-Phinma Cobras ug University of Cebu (UC) Baby Webmasters sa ilang pakigharong batok sa managlahing mga kontra sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Ang Southwestern U makigpinaksitay sa fourth-ranked University of San Carlos (USC) Warriors sa alas 6:45 sa gabii, human ang Baby Webmasters makigbangga sa University of Southern Philippines Foundation (USPF) Baby Panthers sa alas 5:15 sa hapon.

Gumikan sa ilang pagdominar sa eliminasyon, ang Cobras ug ang Baby Webmasters parehong armado og  twice-to-beat advantage. Kini nagpasabot nga nanginahanglan lamang sila og usa ka daog aron  hingpit nang moabante sa kampiyonato.

Ubos sa pagpangu sa langyaw nilang student-athlete nga si Lamine Thiam, ang Cobras ni coach Mike Reyes naglaraw nga parotan na sab ang Warriors, nga ilang gisilhig sa duha ka hugna nga eliminasyon sa iskor nga 62-59 niadtong Septiyembre 21 ug 66-61 niadtong Oktubre 6. Gawas ni Thiam, ang Cobras makasandig sab nilang Shaquille Imperial, Dyll Roncal, William Polican, Red Cachuela, ug Gerald Fernandez aron kab-oton ang ilang tinguha nga makataak sa finals sa labing unang higayon sud sa unom ka tuig.

Samtang ang Warriors maglaum nilang Sommy Managor, Magic Marata, Froilan Mangubat, Jules Langres, Roosevelt Jelianggao, Kurt Trangia ug Kenneth Brillo aron malugwayan pa ang ilang season bisan og usa ka duwa.

Sa juniors division, ang Baby Webmasters naglaraw nga usban ang 56-51 nilang kadaogan batok sa Baby Panthers niadtong Septiyembre 28.

Sama sa una nilang bugno, ang Baby Webmasters angayan nga mangandam alang sa usa ka dakong gubat batok sa Baby Panthers ilabi na ning puntoha diin parehong mahinungdanon ang ilang mga misyon.

Ang Baby Webmasters magsalig nilang Isaiah Blanco, King Balaga, Maczi Micutuan, Kenvon Pondoc,  Allen Gako, ug Luther Leonard, samtang mga pambato sa Baby Panthers mao sila si Christopher Isabelo, Kyle Ochavo, Elijah Singson, Antonio Octaviano, Ramon Singson, Elian Yap, Jack Suello ug Antonio Octaviano.