UCLM mikulit makasaysayanong dao

Cebu, Philippines- Sa katapusan, midaog na gyud ang University of Cebu Lapu-Lapu and Mandaue (UCLM) Campus high school basketball teamIla kining nakab-ot sa makapakurat nga pamaagi.

Salamat sa pagkamabayanihon sa kilas nilang pointguard nga si Joseph Nalos.

Si Nalos milansang og   tres sa nahabibiling 3.6 segundos sa duwa aron aswaton ang UCLM ngadto sa emosyonal kaayong 69-66 nga kadaogan batok sa kanhi wa'y pilde nilang sister-team nga University of Cebu (UC) Junior Webmasters sa kulbahinam kaayo nilang duwa kagahapon diha sa Cebu Coliseum.

Gawas giputol ang unom ka sagunson nilang pilde, ang UCLM ni coach Reggie Licanda mikulit sab og kasaysayan sa pagposte sa labing una nilang daog sa Cebu Schools Athletic Foundation, Inc. (CESAFI) men's basketball tournament.

Human sa sikit kaayong kumbati, ang UCLM misutoy ngadto sa 62-55 nga labaw, apan ang Baby Webmasters, luyo sa paningkamot nilang Isaiah Blanco ug Allen Gako, miresbak aron pagpuwersa og 66-66 nga tabla sa nahibilin nga 1:04 sa duwa.

Dihang naghinangat ang overtime, si Nalos mitunga og kalit aron pagposa sa maong 3-pointer nga seguradong iyang mahinumduman sa tibuok niyang kinabuhi.

Si Nalos mitapos uban ang 16 puntos, apan si Ryan Nemenzo maoy nangu sa UCLM sa iyang 17 puntos, samtang si Kirt Jalalon miamot og 14 puntos.  Sila si Blanco ug Gako nagkumboya'g 25 puntos, samtang si Luther Leonard mikamada og 14 puntos, apan silang tanan nangahuyhoy ang abaga kay naputol ang pito ka sunod-sunod nilang daog. 

Sa sayo pa, si Nathaniel Montecillo mipabuto og 20 puntos, samtang sila si Joshua Baruc ug Jaed Buzon parehong miiskor og 14 sa dihang ang University of San Carlos (USC) Baby Warriors nakaipsot batok sa Cebu Institute of Technology-University (CIT-U) Baby Wildcats, 73-70 alang sa ikatulo nilang daog sud sa pito ka duwa. Ang Baby Wildcats natagak ngadto sa 2-7.