Vietnamese arnisadors nag-training sa Cebu
CEBU, Philippines – Ang 21 ka mga sakop sa Vietnam arnis national team ania karon sa Sugbo aron mag-training uban ang tinguha nga pahugtan ang ilang kampanya sa arnis event sa 30th Southeast Asian (SEA) Games karong Disyembre 1-3 didto sa Angeles University Foundation sa Clark, Pampanga.
Ang Pinoy'ng head coach/trainer sa Vietnam nga si Ruel Gatbonton nagkanayon nga puwede silang mobansay-bansay sa bisan asang dapit, apan ilang gipili ang Cebu gumikan kay anaa tanan dinhi ang ilang mga gikinahanglan.
"We choose Cebu because it is a complete package. No. 1 because of the support, no.2 it is very convenient, and no. 3 the resources are here," matud pa ni Gatbonton, ang gold medalist sa 1998 World Eskrima Kali Arnis Federation (WEKAF) Championships.
Samtang iyang giangkon nga bukid ang ilang tungason batok sa mga Pinoy'ng arnisadors gumikan sa kakulang nila og abilidad ug kasinatian, si Gatbonton nanghinaut nga ang ilang pag-training dinhi sa Sugbo makatabang kanila nga makapakita og maayong labok unya sa kompetisyon.
Si SEA Games arnis tournament manager Gerald Cañete nga mao sab ang Executive Vice President sa Philippine Eskrima Kali Arnis Federation (PEKAF), nagkanayon nga 20 ka bulawang medalya ang ilogan sa upat ka nasud nga misalmot sa arnis.
- Latest
