Tinagsip sa NBA

Zion dili kaduwa sa Pelicans

CEBU, Philippines – Ang top draft pick nga si Zion Williamson dili makaduwa uban sa New Orleans Pelicans sa katapusan nilang pre-season games ugmang adlawa batok sa New York Knicks didto sa Madison Square Garden gumikan kay na-injured ang tuo niining tuhod.

Impresibo ang gipakitang labok ni Williamson uban sa Pelicans human mi-average og 23.3 puntos matag duwa.

Wala pa sa'y klaro kon makaduwa na ba si Zion pagsugod sa ilang kampanya sa regular season batok sa defending champion Toronto Raptors karong Miyerkules didto sa Toronto.

Beal nagpahigot sa Wizards

Si two-time All-Star guard Bradley Beal mipirma og duha ka tuig nga contract extension nga mibalor og $72 million uban sa Washington Wizards.

Kini nagpasabot nga si Beal magpabilin sa Wizards hangtod sa 2021-2022 season. Dugang niiini, dili sab puwede nga i-trade sa dili pa ang 2020 season.

Si Beal, ang No. 3 pick niadtong 2012 Draft, mi-average og career-best 25.6 points, 5.5 assists, 5.0 rebounds ug 1.5 steals matag duwa sa miaging season.

Luol deng mibiya na sa liga

Si Luol Deng hingpit nang miretiro human sa 15 ka tuig nga pagbabad niini sa NBA. Iya kining gipahibalo human mipirma og usa ka adlaw nga kontrata uban sa Chicago Bulls.

Ang maong kasabotan naghatag og higayon ni Deng nga moretiro ubos sa susamang team diin siya unang miduwa human gikuha nga No. 7 pick sa 2004 Draft.

Sa mabulukon niyang karera, ang 36-anyos nga si Deng mi-average og 14.8 points, 6.1 rebounds ug 2.3 assists sud sa 902 ka duwa.