Warriors gitiwasan sa Lakers

Gipakita sa Los Angeles Lakers ang ilang ka dominante dihang ila na sab nga gipilde sa ikatulong higayon ang Golden State Warriors, 126-93 sa NBA pre-season kagahapon didto sa Staples Center sa Los Angeles, California.

Gawas nga wala niduwa ang ilang star player nga si Stephen Curry nga gipapahuway ni coach Steve Kerr, nakapasamot sa kalisud sa Warriors ang dungan nga pagsud sa korte nila ni LeBron James ug Anthony Davis.

Si James mipupo og  18 puntos ug 11 ka assists, samtang si Davis nga bag-o lang nakarekober gikan sa injury sa tudlo, miiskor og otso puntos ug 10 ka rebounds.

Ang kanhi Warriors nga si Quinn Cook mikandos og 16 puntos alang sa Lakers.

Nangulo sa Warriors mao ang bag-o nilang All-Star nga si D'Angelo Russell sa iyang 23 puntos. 

Ang Lakers ug Warriors mag-abot sa katapusang higayon ugma isip pagtak-op sa ilang pre-season games.

Samtang didto sa Texas, ang San Antonio Spurs misakmit sa una nilang daog sa ilang upat  ka duwa sa pre-season dihang ilang gipabagsak ang Houston Rockets, 128-114.

  Nangulo sa Spurs si LaMarcus Aldridge nga dunay 22 puntos.

Ang Rockets napilde bisan pa sa 40 puntos ni James Harden.

Sa ubang mga duwa, ang Atlanta Hawks mibihag sa New York Knicks 100-96, ang Detroit Pistons mipilde sa Charlotte Hornets, 116-110, gipahilom sa Memphis Grizzlies ang Oklahoma City Thunder, 124-119 ug ang Portland Trail Blazers mipukan sa Utah Jazz, 126-118.