Rollway/Abay-abay 3-0 na sa ABCC Inter-Brokerage Cup 2019

Nakalabang sa lawod sa kalisdanan ang Rollway/Abay-abay Customs Brokerage dihang ilang gipanitan ang Avenido Customs Brokerage, 88-71 sa Aduana Basketball Club Cebu (ABCC) Season 2 Inter-Brokerage Cup 2019 niadtong Martes diha sa Cebu Port Authority (CPA) gym sa north reclamation area.

Mibagnos og 26 puntos si Alain Tarona aron pangulohan ang scoring sa Rollway/Abay-abay nga mihakot na og 3-0 nga baraha sa bracket A. Gawas sa iyang puntos, si Tarona mihimo sab og unom ka rebounds, upat ka assists ug tulo ka block shots aron tahuron nga 'best player of the game'.

Nakatabang sab og dako sa kadaogan si Jasper Malingin nga  mitampo og 20 puntos.

Naglisud ang Rollway/Abay-abay sa nag-unang duha ka kuwarter hinungdan nga nalubong sila sa halftime, 30-44. Apan imbes nga maluya, nadasig hinuon sa pakigbisog ang Rollway/Abay-abay ug ilang na-outscored ang Avenido sa third period, 33-7 aron mao na ang molabaw, 63-51 human sa maong kuwarter ug kontrolado na nila ang duwa sukad niadto.

Ang Avenido nga kausa pa lang nidaog sa tulo ka duwa, gipangulohan ni Donald Dungog pinaagi sa iyang 21 puntos, gisundan ni Jovani Mondin nga adunay 13 puntos ug Kevin Juntilla sa iyang 12 puntos.

Sa laing duwa sa bracket A, ang Portmen nagsolo na sab sa liderato dihang ilang gilat-an ang Expressway Logistics & Brokerage Corp., 90-59.

Ang Portmen nagbitbit na og 4-0 nga baraha.

Si Perry Niones nga maoy 'best player', mikabkab og 17 puntos uban ang pito ka rebounds, lima ka assists ug duha ka steals maoy nangu sa upat ka Portmen players nga mikadlit og double figures.

Si Victor Taborada miamot og 16 puntos, samtang sila si Boodee Monteño ug Mark Rodriguez mitampo'g 14 puntos matag usa sa Portmen, kansang kadaogan nagpangamay human milabaw og 26 puntos sa sayong bahin sa fourth quarter, 69-43.

Si Julius Espinosa lang ang miiskor og double figures sa Expressway pinaagi sa iyang 15 puntos hinungdan nga nakatilaw sila sa ikaduha nilang pilde.

Ang Expressway nagbitbit karon og 1-2 nga baraha ning maong liga nga gipadagan ni commissioner Sidney Ganapin.PUNTOS MATAG USA

Unang duwa:

ROLLWAY/ABAY-ABAY (88) – Tarona 26, Malingin 20, Urbina 9, Amorin 7, Yncierto 7, Sanchez 6, J. Palad 5, Jamolin 3, Olloves 2, Matias 1.

AVENIDO (71) – Dungog 21, J. Mondin 13, Juntilla 12, Apa 7, Oporto 7, E.  Avenido 3, Tampus 2, Torreon 2.

Ikaduhang duwa:

PORTMENT (98) – P. Niones 17, Taborada 16, Monteño 14, Rodriguez 14, C. Niones 7, Oyao 6, Maunes 6, Regidor 6, Rabago 6, Tan 4, Gacilos 2.

EXPRESSWAY (59) – J. Espinosa 15, G. Espinosa 9, N. Co 8, Blanco 7, Pingkian 6, M. Co 4, Matidios 3, Plando 2, Villano 2.