Lowry mipirma og lab-as nga kontrata
CEBU, Philippines — Gipirmahan na ni Kyle Lowry ang lab-as niyang kontrata uban sa defending NBA champion Toronto Raptors kagahapong adlawa.
Wala hinuon gidetalye sa Toronto management kon unsay nakab-ot nilang kasabotan, apan segun sa nahiunang mga balita, gilugwayan sa Raptors ang buhing kontrata ni Lowry og usa ka tuig sa kantidad nga $31 million.
Kini nagpasabot nga si Lowry magpabilin sa Raptors hangtod pa sa 2021 season.
Ang paghigot ni Lowry sa ilang poder prayoridad gyud sa Raptors gumikan sa pagkagiw ni Kawhi Leonard ngadto sa Los Angeles Clippers niadtong off-season.
"Kyle has been at the heart of every successful run our franchise has achieved the past seven seasons," matud pa ni Raptors President of basketball operations Masai Ujiri. "He is a competitor, a winner at every level and the engine that our players and city feed off from."
Sa makasaysayanon nilang kampanya, ang 33-anyos nga si Lowry mi-average og career-best 8.7 assists matag duwa sa regular season. Mipabuto sab siya og 26 puntos nga nakatabang sa Raptors pagpalukapa sa Golden State Warriors sa Game- 6 sa NBA Finals aron langkaton ang labing una nilang kampiyonato.
Sa iyang bahin, wa'y kasudlan si Lowry sa iyang kalipay nga magpabilin siya sa Raptors.
"I'm very proud of what we have achieved with the Raptors, and I'm happy to be able to continue to call the Toronto my home," sumala pa ni Lowry. "Bringing a championship to the city of Toronto and the country of Canada has been one the best things I've done so far in my career, and I'll push for that goal every single year I play this game."
- Latest
