Petecio nangambisyon og bulawan sa SEA Games

CEBU, Philippines — Nahibalik na sa Pilipinas ang Pinay'ng boxer nga si Nesthy Petecio gikan mikabkab og bulawang medalya  sa 2019 AIBA Women's World Boxing Championship sa Russia.

Si Petecio nga gisugat sa kadagkoan sa Philippine sports ug iyang pamilya, emosyonal nga miatubang sa mga media diin gipasalamatan niya ang suporta nga iyang nadawat. Ang 27-anyos nga si Petecio miingon nga  ang pagpangandam sa Southeast Asian Games sunod bulan dinhi sa Pilipinas maoy una niyang prayoridad. 

Matud ni Nesthy  nga matibuok ang iyang kalipay kon masakmit na niya ang gold medal sa SEA Games.

Si Petecio wala pa katilaw og bulawan sa SEA Games.  Aduna  siya'y tulo ka silver medals sa iyang pagsalmot sa  2011, 2013 ug 2015 editions.

Si ABAP general-secretary Ed Picson miingon nga nakita niya ang kadeterminado ni Petecio nga makuha ang gold medal ug timaan niini ang iyang pagdominar sa World Championship.

"She's the world champion so it's logical for her to dominate in the SEA Games,"  matud pa ni Picson sa The Philippine STAR.  

Gawas ni Petecio, laing duha ka Pinay boxer ang gilauman sa nasud sa SEA Games mao sila si Irish Magno ug Aira Villegas.