'Out-of-towners' moapil sa CEPCA tatluhan Chessfest

CEBU, Philippines — Usa ka lig-ong tropa sa mga out-of-town players ang manulong dinhi sa Sugbo alang sa 3rd Boy 'Chessmoso' Pestaño Memorial Chess Cup Tatluhan Rapid Tournament nga gi-organisar sa Cebu Executives and Professionals Chess Association (CEPCA) karong Oktubre 19-20 diha sa Barracks Chess Club sa Robinsons Galleria Cebu.

Nag-una sa listahan sa mga mohagit sa mga Sugboanon mao ang CDO Veterans Move gikan sa Dakbayan sa Cagayan de Oro ubos sa pagtimon ni Jaime Joshua Frias II.

Ang 36-anyos nga si Frias moduwa kauban silang Cleto Vasquez ug Edward Tare. 

Sa miaging tuig, si Frias ug ang iyang grupo mipahiluna sa ikatulong dapit. Nanghinaut si Frias nga masustinir ang iyang ratsada human siya mihakop og duha ka sagunson nga kampiyonato gawas sa nasud.

Si Frias naghari sa Australian Open nga giulohan og "2019 02C Doeberl Cup Major Chess Tournament" niadtong Abril 19-22 didto sa Canberra Southern Cross Club sa Canberra, ug dayon gidominar ang 26th Abu Dhabi International Chess Festival niadtong Agosto 10 didto sa Abu Dhabi, United Arab Emirates.

Sa laing bahin, ang Sagay City Chess Club sa Negros Occidental nga gipangulohan ni Cocoy Pimentel mopadala og duha ka teams, ang Tagbilaran City moparada nilang Norman Longjas, Glicerio Pardilla ug Genesis Apog, samtang ang Toledo City magsandig nilang Bonn Rainuld Tibod, Christopher Tubalado, ug Rosano Manigo.

Ang CEPCA Team A  nga pagabidahan nilang Venancio Loyola, National Master Arnolito Cadiz ug Carlo Maraat, mibalik aron depensaan ang ilang korona.

Lain pang mga players nga angayan atngan mao sila si Richard Natividad, Ruel Nutal ug Martin Kwan sa The Bachelors, Joel Pacuribot, Carlos Moreno III ug Bong San Pascual sa Cebu Progress Marketing, Tony Cabibil sa Team DPWH, ug International Masters Kim Steven Yap ug Joel Pimentel nga maoy mangu sa tagsa-tagsa nilang ka mga koponan.

Ang makampiyon mobulsa og P30,000. Ang mopahiluna sa ikaduha ngadto sa ikalimang dapit mokabi og P20,000, P10,000, P7,000 ug P5,000, samtang kadtong maapil sa top 12 dunay P2,000 matag usa.

Ang top 3 board players duna say bonus nga P1,000.

Ang rehistrasyon nagkantidad og P1,800. Ang mga organizers modawat og on-site registration, apan hangtod  lamang sa udto karong Sabado kon usa ka oras sa dili pa sugdan ang kompetisyon.

Alang sa dugang detalye, kadtong mga interesado mahimong mokontak nilang Engr. John Velarde (0933-1096622/0917-6666717), Jerel Velarde (0995-0338922), Ruel Hortelano (0942-2722354), Marvin Ruelan (0932-7152411) o Jun Olis (0942-4641565).