Lakers mipilde na sab sa Warriors
CEBU, Philippines — Gipilde na sab sa Los Angeles Lakers ang Golden State Warriors, 104-98 sa ikaduha nilang NBA pre-season game kagahapon didto sa Staples Center sa Los Angeles, California.
Kini bisan pa man og wala miduwa ang upat nila ka mga bitoon nga sila si LeBron James, Anthony Davis, Kyle Kuzma ug Danny Green nga pulos mipahuway.
Si Zach Norvell Jr. miiskor og 22 puntos, samtang si Devonte Cacok miamot og 16 puntos alang sa Lakers nga mikulit sa ikaduha nilang daog sud sa upat ka duwa.
Si Damian Lee mihipos og 18 puntos ug siyam ka rebounds, si Stephen Curry dunay 14 puntos, samtang si Marquese Chriss mikamada og 14 puntos, 11 ka rebounds, upat ka assists ug tulo ka blocks alang sa Warriors nga napukan sa ikaduhang higayon sud sa tulo ka duwa.
Sa laing aksiyon, si Terry Rozier mipupo og 24 puntos ug walo ka assists alang sa Charlotte Hornets nga miposte sa una nilang daog human gilubong ang Memphis Grizzlies sa iskor nga 120-99.
Sa uban pang mga resulta, ang Dallas Mavericks mipakaging sa Oklahoma City Thunder, 107-70, ang Sactamento Kings mibuntog sa Utah Jazz, 128-115, samtang ang Denver Nuggets mipukan sa Phoenix Suns sa iskor nga 107-102.
- Latest
