Dalaguete naghari sa cluster 2 sa GUV CUP Volleyball
CEBU, Philippines — Ang host Dalaguete maoy midominar sa cluster 2 sa Governor Gwen Garcia Unity Volleyball (GUV) Cup didto sa Dalaguete Sports Complex niadtong weekend.
Human sa duha ka adlaw nga aksiyon, ang Dalaguete nag-triple tie uban ang Oslob ug Boljoon bitbit ang managsamang 4-1 win-loss records, apan ang Dalaguete maoy mi-angkon sa unang puwesto gumikan sa mas taas niining tie-breaker gamit ang ranking system sa Asian Volleyball Confederation.
Giablihan sa Dalaguete ang ilang kampanya pinaagi sa pagposte og 25-13, 25-4 nga daog batok sa Boljoon, apan nahagba sila sa mga kamot sa Alcoy, 18-25, 21-25.
Nakabawi hinuon ang Dalaguete aron patikangkangon ang Oslob, 25-17, 25-21, Ginatilan, 25-4, 25-8 ug Santander, 25-10, 25-20.
Samtang ang Oslob mibuntog sa Ginatilan, 25-18, 25-19 ug dayon gitumba ang Santander, 25-19, 25-21.
Sa sunod nga adlaw, ang Oslob mipayaka sa Alcoy, 25-14,25-23 ug dayon gitak-op ang ilang adlaw pinaagi sa pagpakaging sa Boljoon, 25-18, 25-17.
Ang Alcoy midaog tuod sa Dalaguete, apan miyukbo sa Oslob, 25-14, 25-23.
Ang Alcoy milampos hinuon sa lain nilang tulo ka duwa, apil ang batok sa Santander sud sa tulo ka sets, 21-25, 25-23, 25-16.
Human sa Dalaguete, ang aksiyon ning torneyo nga gipadagan sa Cebu Volleyball Association (CEVA) molabyog didto sa Moalboal karong weekend alang sa cluster 3 elimination.
- Latest