Lakers batok Warriors

CEBU, Philippines — Mag-abot karon ang magkaribal nga superstars nga sila si LeBron James sa Los Angeles Lakers ug Stephen Curry  sa Golden State sa NBA pre-season game didto Chase Center sa San Francisco, California, ang bag-ong balwarte sa Warriors.

Gikahinaman sa mga fans ang maong duwa ilabi na  nga  paduwaon sa Lakers ang ilang superstar tandem nga sila si James ug Anthony Davis karong adlawa.

Una nang gipahibalo ni Lakers coach Frank Vogel nga dili kaayo nila paduwaon og maayo si James sa pre-season, apan atngan ang pagpakita niini og aksiyon batok sa Warriors.

Kini ang unang higayon nga mapakita sa Lakers ang ilang kusog human sa dakong kausaban sa ilang line-up atol sa off-season.

Gawas ni Davis, laing mga bag-ong players sa Lakers naglakip nila ni Dwight Howard, Danny Green ug Avery Bradley.

Sa ilang bahin, ang Warriors mopakita nga sila gihapon ang labing lig-on nga title contender gikan sa Western Conference bisan pa sa paghawa nila ni Kevin Durant, Andre Iguodala ug DeMarcus Cousins.

Uban ni Curry nga mosuway pagsumpo sa Lakers mao sila si Draymond Green ug bag-ong shooter nga si D'Angelo Russell, kinsa interesante tungod kay misugod kini sa iyang NBA career isip Lakers rookie niadtong 2015.

Dili pa kaduwa ang katimbang ni Curry nga si Klay Thompson kay padayon pa nga nagpaalim sa iyang ACL injury nga nahiaguman sa miaging finals batok Toronto Raptors.