Abueva gusto nang malibkas iyang suspensiyon
CEBU, Philippines – Gitug-an ni PBA Commissioner Willie Marcial nga mihangyo na usab kaniya si Calvin Abueva nga libkason na ang 'indefinite suspension' nga gipahamtang sa liga ngadto kaniya.
Si Marcial miingon nga mikontak kaniya si ang suspendidong PBA star nga si Abueva a miaging semana ug nangutana ang Phoenix Fuel Masters kon kanus-a ang posibleng pagbalik niya sa PBA. Wala hinuon gihatag ni Marcial ang detalye ug ang iyang tubag sa hangyo sa PBA All-Star.
Si Abueva suspenso uban ang P70,000 nga multa human sa iyang bug-at nga salaod sa miaging PBA Commissioner's Cup. Naglakip kini sa paglamparo ni TNT KaTropa import Terrence Jones ug pagbinastos atubangan sa uyab ni Blackwater Elite rookie Ray Parks Jr.
Miingon hinuon si Marcial nga ang paglibkas sa suspensiyon magdepende sa pagpangayo og pasaylo ni Abueva sa iyang nabikitma ug pagpakita nga nagbag-o na siya.
Si Abueva padayon nga mihimo og libreng basketball clinic sa mga bata didto sa Pampanga.
- Latest
