US Team inilog gihapon sa Tokyo Olympics

CEBU, Philippines — Bisan pa og sila ang misakmit sa kampiyonato sa World Cup,  si Spanish basketball team coach Sergio Scariolo miingon nga ang Team USA mao  gihapon ang labing inilog nga koponan sa Tokyo Olympics sunod tuig didto sa Japan.

Si Scariolo nagkanayon nga dili mahimong hukman ang kalidad sa US Team sa gipakita niining performance sa miaging World Cup didto sa China nga igo lang kini nga milandig sa ikapitong dapit.

"I'm expecting them to be so strong next year," matud pa ni Scariolo sa Associated Press.

Nasayran nga duha na ka NBA superstars nga sila si Stephen Curry ug Damian Lillard ang mipadayag sa ilang interes nga moduwa sa US sa Olympics.

Mitug-an si Scariolo  nga miasenso na ang ubang koponan ilabi na ang mga sama kanila nga European teams, apan dakong sayop kon huna-hunaon nila nga wala na ang kadominante sa mga Amerikano sa basketbol sa tibuok kalibotan.

Ang Spain  bidahan gihapon sa mga NBA players nga sila si Marc Gasol, Ricky Rubio ug Juan Hernangomez, apan miangkon si Scariolo nga huyang kini kon iparada sa Team USA ang tanan nilang superstars sa Olympics.

Gawas nila ni Curry ug Lillard, giatngan sab ang pagduwa nilang James Harden ug Anthony Davis.