PB Corp. mikadlit ikatulong daog sa Alegado Cup

CEBU, Philippines — Si Rumar Ponce mitagak og 26 puntos aron pangulohan ang PB Corporation ngadto sa 110-96 nga kadaogan sud sa overtime batok sa Saritha sa open category sa 10th Mayor Alegado Cup Inter-Barangay Fiesta Basketball League didto sa Consolacion.

Dako sab og naambag si Lemuel Malagar nga mitali og 19 puntos ug ingon man si Regie Gabato nga mikamada og 16 puntos alang sa PB Corp. nga mipahugot sa ilang pagkupot sa ikaduhang puwesto sa standings bitbit ang 3-1 nga baraha.

Sila si Franco Te, Philip Niño Garcia ug Mils Anthony Lunao parehong miiskor og 10 puntos timaan sa balanseng ataki sa PB Corp.

Human sa 90-90 nga panagtabla sa regulasyon, nag-wild ang PB Corp. sa dugang singko minutos sa aksiyon diin ilang gilimitahan ang Saritha ngadto lamang sa sayes puntos, samtang sila mipabuto og 20 aron ibulsa ang daog.

Si Jonel Maglasang mipupo og 26 puntos, samtang sila si Brevin Keith Padayogdog ug Godfrey Sabanal nagkumbinar og 25 puntos alang sa Saritha nga misukarap ngadto sa ikatulo nilang sagunson nga pilde.

Sa laing bahin, ang Casili ug Polog mitikang na sa semifinals sa tagsa-tagsa nila ka mga kategoriya.

Sila si Kendrick Bob Alcover ug Regnier Gonzaga nagkumboya og 41 puntos sa dihang gipalagpot sa Casili ang Cabangahan, 79-65 aron pag-abante sa Final 4 sa SK juniors category A, samtang sila si Pablito Balaba, Raymond Lahoylahoy ug Kevinson Labapez nakatigum og 54 puntos sa dihang gipabakwit sa Polog ang Panas, 81-77 aron pag-angkon og luna sa SK juniors category B semis.