Goats mipAtilaw og pilde sa Chameleons sa USC-NABC
CEBU, Philippines — Ang 2002 Goats mipatigbabaw batok sa 2005 Chameleons, 68-5 sa sangka tali sa mga wa'y pildeng koponan sa 2019 University of San Carlos-North Alumni Basketball Conference (USC-NABC) Cebu City Mayor's Cup diha sa USC-North Campus gymnasium.
Si Joel Dinawanao mipatak og 18 puntos alang sa Goats nga nagsolo na karon sa liderato sa Division 2 bitbit ang perpektong 3-0 record. Samtang ang Chameleons nabugto ang tulo ka sagunson nga daog.
Sa uban pang mga aksiyon, ang Ninety Niners, 1988 Barakos, 2013 District ug 2011 Sharks miinat tanan sa ilang baraha ngadto sa 3-1.
Sa ikatulong sunod-sunod nga higayon, si Joseph Chu Bragat nagmangtas aron mokadlit og 32 puntos ug ingon man pangulohan ang Ninety Niners ngadto sa 77-65 nga kadaogan batok sa 1995 Bulldogs, samtang si King Osabel miamot og 25 puntos sa dihang gipatikangkang sa District ang 2009 Legacy, 89-70.
Wala sab magpa-alkansi si Dindo Sausa nga miratsada og 27 puntos sa Barakos nga mipilde sa 1987 Bros sa iskor nga 61-56, samtang si Dave Guardiario mitali og 26 puntos sa dihang gilubong sa Sharks ang 2007 Waybus, 80-60.
Sa laing bahin, ang 1995 Pirates ug 2005 Rebels parehong misanta sa tulo ka sagunson nilang pilde.
Si Emerson Jaime miposte og 25 puntos sa dihang gipanitan sa Pirates ang 1992 Little Rascals, 63-49, samtang si Ian
Callet dunay 12 puntos alang sa Rebels nga nakadaog na sab human gibihag ang 2002 Lions, 65-58.
Sa lain pang mga resulta, ang 2003 Stallions milampaso sa 2001 Builders sa iskor nga 66-42, samtang ang 1996 Chubbies milampurnas sa 1993 Dragons, 64-48.
Si Ramon Datan maoy bida sa Stallions uban ang 16 puntos, samtang si Ramesh Mulchandani maoy nangu sa Chubbies sa iyang 18 puntos.
- Latest
