SHS-Ateneo kampiyon gihapon sa Passerelle
CEBU, Philippines — Milampos ang Sacred Heart School-Ateneo de Cebu pagdepensa sa ilang korona sa Passerelle division human giwani ang University of the Visayas, 68-61, sa tinagakay nilang kampiyonato sa 34th SBP Passerelle Twin Tournament nga gipaluyohan sa Milo niadtong weekend didto sa Alta Vista Golf and Country Club gym.
Ang Magis Eagles miposte og 17-11 nga bentaha sa unang kuwarter luyo sa pagpanginit ni Joseph Dytian. Misalida sab dayon sila si MVP Joash Cutamora ug Rafael Arradaza nga nagkumbinar og 17 puntos sa ikaduhang kuwarter aron pag-abante sa iskor nga 34-25 human sa first half.
Misamot pa ang kainit sa Magis Eagles hinungdan nga ilang gipadak-an ang ilang labaw ngadto sa 20 puntos, 52-32 pinaagi sa tulo ka tres ni Alden Cainglet ug sa liderato ni Jared Bahay.
Nakasikit hinuon ang UV ngadto na lang sa sayes puntos, 57-63 sa nahibilin nga 3:15 sa duwa, apan mao na diay kadto ang katapusan nilang utong gumikan kay si Bahay milansang og tres sa wala pa si Cutamora mipasud sa iyang itsa aron pagpaginhawa og lawom sa SHS-Ateneo, 68-57 sa katapusang 1:45 sa aksiyon.
Sila si Cainglet ug Cutamora maoy nangu sa SHS-Ateneo uban ang 12 puntos matag usa.
Sa gubat alang sa ikatulong dapit, ang SWU-Phinma mipukan sa University of San Carlos, 52-42.
- Latest
