Marino nakadaog na gyud!

CEBU, Philippines —  Gipayaka sa Marino ang Saritha Mauriane, 87-75 alang sa una nilang daog sa open category sa 10th Mayor Alegado Cup Inter-Barangay Fiesta Basketball League didto sa Consolacion.

Si Emmanuel Villamor mipabuto og 24 puntos ug si Randy Colonia mitimbre og 22 puntos alang sa Marino ni team owner Stanley Robinta.

Midugang si Ryan Chavez og 17 puntos alang sa Marino nga milusad og  24-13 rally sa ikaduhang kuwarter aron ilogon ang labaw sa halftime, 42-38. 

Misamot pa ng kainit sa Marino hinungdan nga ilang gilubong ang Saritha og 14 puntos, 68-54  human sa tulo ka kuwarter.  

Si Jan Haniel Abinales dunay 20 puntos, samtang sila si Brevin Keith Padayogdog ug Jonel Maglasang mihipos og 15 puntos matag usa sa Saritha nga misukarap sa ikaduha nilang sagunson nga pilde.

Sa inter-barangay, ang Tolotolo ug Polog milukat og tiket sa finals sa tagsa-tagsa nila ka mga kategoriya.

Sa SK juniors category B, si Jessie Bathan mikamada og 25 puntos, samtang si Jay Harold Herbieto midonar og 18 puntos sa dihang gipabakwit sa Tolotolo ang Garing, 89-77 aron pag-abante sa finals.

Ang Polog mipadala sab og duha ka teams ngadto sa championship round human gipalayas ang Garing sa midget category B ug ingon man sa seniors category B.

Si Flourence Alipan maoy nangu sa Polog uban ang 21 puntos sa midget category B, samtang si Paul Dave Branzuela maoy bida sa seniors category B bitbit sa iyang 16 puntos.