Baby Lancers namawi dayon
CEBU, Philippines — Nakabawi dayon sa makauulaw nga kapildihan ang University of the Visayas (UV) Baby Lancers dihang ilang gibuntog ang Sacred Heart School-Ateneo de Cebu (SHS-AdC) Magis Eagles sa juniors division sa 19th Cebu Schools Athletic Foundation, Inc. (CESAFI) men's basketball tournament kagahapon diha sa Cebu Coliseum.
Sa dihang nagtabla ang iskor, 39-39 human sa tulo ka kuwarter, si Vince Tangkay mikadlit og lima ka sagunson nga puntos aron pagpalabaw sa Magis Eagles, 44-42, apan si Jay Alilin miposa og duha ka tres sa 8-0 rally nga sa kalit lang nakapalabaw sa Baby Lancers, 50-44. Si Alilin miiskor sa tanan niyang siyete puntos sa katapusang kuwarter.
Ang Magis Eagles katapusang nakasikit sa iskor nga 48-50 gumikan kay ang Baby Lancers mitak-op sa duwa pinaagi sa 7-0 run nga maoy nagsilyo sa ilang kadaogan.
Si Albert Sacayan mitapos uban ang 17 puntos, samtang si Samuel Melicor miamot og 12 puntos sa Baby Lancers nga tataw nga naka-move-on na human makatilaw og 46-87 nga kapildihan gikan sa defending champion University of Cebu (UC) Junior Webmasters.
Sa sayo pa, sila si Paul Apolonio ug Blaire Bulsa miiskor og 14 puntos matag usa, samtang si Winston Biligil midugang og 13 puntos sa dihang gipaksit sa Cebu Eastern College (CEC) Dragons ang UC Lapu-Lapu and Mandaue Campus sa iskor nga 68-60 alang sa una nilang daog.
- Latest
