Casili laing semifinalist; PB Corp. daog na sab sa 10th Alegado Cup

CEBU, Philippines — Ang Casili maoy labing uwahing nadugang sa listahan sa mga semifinalists human nakaipsot batok sa Jugan, 84-78 sa seniors category A sa 10th Mayor Alegado Cup Inter-Barangay Fiesta Basketball League didto sa Consolacion.

Si Rey Gonzaga mikadlit og 29 puntos, samtang sila si Dwight Gonzaga ug Jeffrey Cavan nagkumboya'g 25 puntos alang sa Casili nga armado og twice-to-beat incentive sa Final 4  isip  No.1 team sa ilang bracket.

Sa susamang kategoriya, ang Pulpogan nakaangkon pa og laing tsansa nga madepensaan ang ilang korona human gipukan ang Pitogo, 86-78 sa tagakay nilang duwa.

Si Ernesto Tudtud maoy nangu sa Pulpogan uban ang 23 puntos, gisundan  ni  Chris Yonnel Perolino nga adunay 20 puntos.

Sa midgets category, ang Poblacion Oriental mitikang na sab sa semis human gilat-an ang Poblacion Occidental, 64-48 sa ilang knockout match.

Sila si Niño Charbel Sanchez, Rodolfo Froilan Maglasang ug Carlo Dale Maglasang nagkumbinar og 39 puntos alang sa Poblacion Oriental nga bukid ang tungason sunod kay ilang sangkaon mao man ang top-ranked Pulpogan sunod semana.

Sa open category, si Regie Gabato maoy bida sa lima ka players nga naka-double figures uban ang 19 puntos sa dihang gipiog sa PB Corp. ang Goebert Store, 86-81  aron   pagsolo niini sa ikaduhang dapit sa liderato bitbit ang 2-1 win-loss card.

Sila si Rumar Ponce (16), Lemuel Malagar (15), Philip Niño Garcia (14) ug Mils Anthony Linao (12) mitali sab og double digits alang sa PB Corp. nga nagmangtas sa naghinapos nga bahin sa duwa aron patikalbungon ang Geobert.