Gilas mipukan sa adelaide 36ers

CEBU, Philippines — Bisan pa sa mga  problema  nga nasinati sa Gilas Pilipinas, gipakita sa national team nga andam gihapon sila alang sa  FIBA World Cup  nga buksan karong  Agosto 31 didto sa China.

Gumikan kay ilang gilatos ang nanulong nga Adelaide 36ers sa Australia, 92-83 niadtong Biyernes sa gabii didto sa Meralco gym.

  Ang Adelaide 36ers  nga kampiyon sa Australian league  gikontra sa Gilas alang sa katapusan nilang tune-up games sa dili pa sila molarga paingon China sunod semana.

Ang ex-NBA center ug naturalized  player  nga si Andray Blatche mirehistro og 19 puntos ug milangkat og  18 ka rebounds aron pangulohan ang Gilas, apan ang Sugboanong si Roger Pogoy ang nahimong bida dihang siya ang miduslit sa fourth quarter rally  aron mabiyaan ang  Adelaide 36rs.

Gikan sa 80-81 nga biya batok sa Adelaide 36ers, ang Gilas miratsada ug miposte og 11 puntos nga labaw sa iskor nga 90-81 gikan sa nagtusaktusak nga tira ni Pogoy gikan sa gawas.

Si Pogoy adunay 10 puntos, siyam niini gikan sa fourth quarter. 

Balanse nga opensa ang gipakita sa Gilas dihang si Japeth Aguilar miiskor og 17 puntos, samtang ang rookie nga si CJ Perez mitampo og 12 puntos.

"The 36ers gave us a really good game. I felt it was exactly what we needed. Yun yung kailangan talaga natin, rugged, physical, playing against bigger guys, playing against bigs who can run the floor, who are quick. Doon tayo nagkakaproblema e," matud pa ni Guiao sa Spin.ph.

Laraw ni Guiao  nga maharos nila ang Adelaide 36ers sa ikaduha ug katapusan nilang duwa karong gabii didto gihapon sa Meralco Gym.