2 ka Pinoy'ng boksidor manalipod sa korona

CEBU, Philippines — Sa sulagma kaayo nga pagkatakdo, duha ka Pinoy'ng world boxing champions ang modepensa sa tagsa-tagsa nila ka mga titulo karong adlawa. 

Ang usa moaway sa yuta niyang natawhan, samtang ang lain nanulong sa teritoryo sa iyang kontra.

Didto sa San Andres Sports Complex sa kaulohan karong gabii, si John Riel 'Cuardo Alas' Casimero (27-4, 18KOs) manalipod sa iyang trono isip World Boxing Organization (WBO) interim bantamweight champion batok ni Mexican challenger Cesar Ramirez (18-3, 11KOs).

Ang 12 ka hugna nilang binukbukay gi-promote ni Pinoy ring star Manny Pacquiao ug abli kini sa publiko nga libre.

Ang 31-anyos nga garbo sa Ormoc City modepensa sa bakus nga iyang nabira human patikangkanga si Ricardo Espinoza niadtong Abril 21 sa iyang US debut.

Ang modaog sa  sangka nilang Casimero ug Ramirez obligado nga makigharong ni WBO regular bantamweight champion Zolane Tete sa South Africa.

Samtang didto sa Puerto Rico Convention Center sa San Juan, Puerto Rico, ang kababayan ni Casimero nga si Vic 'Vicious' Saludar (19-3, 10KOs) sa Polomolok, South Cotabato modepensa sab sa iyang korona isip WBO minumumweight champion batok ni Wilfredo  'Bimbito'  Mendez (13-1, 5KOs).

Mao kini ang ikaduhang higayon nga ang 28-anyos nga si Saludar manalipod sa titulo nga iyang nalangkat human pildiha ang Hapon nga si Ryuya Yamanaka niadtong Hulyo 13 sa miaging tuig didto sa Central Gym sa Kobe, Hyogo. 

Sa una niyang depensa, gibuntog ni Saludar ang Hapon nga si Masataka Taniguchi niadtong Pebrero 26 ning tuiga didto sa Korakuen Hall sa Tokyo.