Pacquiao wa'y gikahadlokan

CEBU, Philippines – Ang kalibotan ni Manny Pacquiao wala lamang magtuyok ni Floyd Mayweather Jr. ug gani duna na'y daghang opsiyon nga nakalinya alang sa Pinoy ring star.

Kon ugaling dili na gyud mahitabo ang gihandum nga 'rematch' nilang Mayweather, ang kampo ni Pacquiao ubos sa pagtimon ni international matchmaker Sean Gibbons duna na'y gisaytan nga posibleng makontra sa Pinoy'ng kampiyon sa pagbalik niini og away sunod tuig.

Apil na niini ang modaog sa welterweight unification bout tali nilang Errol Spence Jr. ug Shawn Porter karong Septiyembre 28.

Nalakip sab sa ilang listahan ang wa'y pildeng WBO champion nga si Terence Crawford ug ang lain pang duha ka bug-at nga mga pangan sa welterweight division nga sila si Mikey Garcia ug Danny Garcia.

Gihisgutan sab si Marcos Maidana, kinsa mipadayag nang daan nga andam siyang mohaw-as gikan sa pagkaretirado sa kondisyon nga si Pacquiao maoy iyang makaharong ibabaw sa ring.

Giklaro ni Gibbons nga ang 40-anyos nga si Pacquiao wa'y gikahadlokan ning puntoha sa iyang karera ug andam sila nga makigbugno sa kon kinsa man gani ang ipresenta sa ilang atubangan.

"We will fight whoever is presented," matud pa ni Gibbons segun sa taho sa World Boxing News.