Caitom misaad og k.o. nga daog sa WBC Asia title fight

CEBU, Philippines – Ang Sugboanong boksidor nga si Rey 'The Future' Caitom Jr. mosuway og paduol sa iyang tinguha nga maka-away alang sa world title sa dihang iyang sangkaon si Ellias Ngenggo sa Indonesia alang sa World Boxing Council (WBC) Asian Boxing Council minimumweight belt karong Septiyembre 28 didto sa Juggernaut Fight Club sa Singapore.

Si Caitom nga gidumala na karon ni Arvind Lalwani sa Singapore Fighting Championship, wa'y kurat nga namahayag nga iyang tumbahon si Ngenggo sa iya unyang binukbukay nga gikatakda sud sa 10 ka hugna.

"Ako ikapasalig ani nga fight nga naa gyud matumba puhon ug modaog gyud ko ani kay ready na kaayo ko sa fight," matud pa sa garbo sa Dakbayan sa Mandaue nga atua na karon magbasi sa gibansagan nga Lion City diin siya nagtrabaho isip trainer sa Unbeatable Boxing and Fitness Training gym.

Tataw nga buhaton ni Caitom ang tanan kutob sa iyang mahimo aron molampos gumikan kay magseguro man kini kaniya og luna sa top 15 sa world rankings, butang nga iyang gihandum tipik sa iyang damgo nga mamahimong world champion.

Miangkon hinuon ang 33-anyos nga si Caitom nga angayan siyang magmatngon ni Ngenggo. 

Napilde man tuod ang Indon sa katapusan niyang unom ka away pinaagi sa knockout, apan duna kini kapasidad nga mobunlot og surprisa sama sa iyang pagpalukapa ni kanhi world champion Merlito 'Tiger' Sabillo niadtong Nobiyembre 5, 2014 diha sa Waterfront-Cebu City Hotel and Casino.

Si Sabillo kauban ni Caitom sa dihang diha pa kini sa poder sa ALA Gym. 

"Lig-on ug beterano si Ngenggo kay na-knockout niya si Merlito Sabillo sa pinoy Pride," dugang pa ni Caitom. "Maayo pud siya nga counter puncher. Pero mo-adjust rako sa actual fight puhon if unsa iya mga combination. Sa karon, focus ko sa training ilabi na sa akoang conditioning ug power."

Mao kini ang ikatulong higayon nga si Caitom mopakita'g aksiyon sukad siya mibalik og boksing human sa 13 ka tuig nga pahulay.

Niadtong Nobiyembre 23 sa miaging tuig, si Caitom mipilde ni Silem Serang sa Indonesia pinaagi sa unanimous decision didto sa The Ring Boxing Community sa Singapore.

Niadto lamang Hunyo 29, si Caitom milugwa nga mas bangis ug mas hait hinungdan sa pagpatikangkang niya ni Khachonsak Pothong sa Thailand sud lamang sa duha ka hugna aron inaton ang wa'y pilde niyang rekord ngadto sa 8-0-1 uban ang 3KOs.