Lucky 7 sweep sa Pañeros sa IBP caging
CEBU, Philippines – Gikastigo sa Pañeros ang Dissenters Bad Boys, 97-73 aron molansang og 7-0 sweep sa eliminasyon sa 2019 Intergrated Bar of the Philippines (IBP)-Cebu Basketball League First Conference diha sa Capitol Parish gym sa dalan Escario ning Dakbayan sa Sugbo.
Si Barrytone Busi mikadlit og 27 puntos aron pangulohan ang unom ka Pañeros nga mirehistro og double figures.
Miamot si Gilbert Arrabis og 15 puntos, sila si Franklin Manching ug Niño Rey Retuya parehong miiskor og 13, samtang sila si Nilo Balorio ug William Mañus nagkumbinar og 22 puntos alang sa Pañeros nga milubong sa Bad Boys og taga-liog, 77-42 human sa tulo ka kuwarter.
Si Lito Ortiz dunay 19 puntos alang sa Bad Boys nga maoy rank No. 5 padung sa playoffs bitbit ang 3-4 win-loss record.
Sa ubang mga duwa, ang defending champion Gilas Defenders mipakaging sa Spartans, 99-87 aron paglugwa nga second seed dala ang 6-1 nga baraha, samtang ang 1Cebu Lex Idols midemolis sa Aniceta Red Vipers, 106-61 aron tak-upon ang ilang kampanya sa ikaupat nga puwesto uban ang 4-3 nga marka.
Mipabuto si Van Ligutan og 38 puntos, samtang si Christopher Ang mitimbre og 27 puntos alang sa Gilas Defenders nga milusad og 51-35 rally sa tunga-tungang mga kuwarter aron pagtikalbongon ang Spartans, nga bisan og naparot nagpabilin sa ikatulong dapit bitbit ang 5-2 nga baraha.
Sa laing bahin, si Edwin Estorgio mitagak og 30 puntos, samtang sila si Reman Manubag ug Fermin Pepito nagkumboya'g 31 puntos alang sa Lex Idols nga wa'y puas nga mikulata sa Red Vipers matag kuwarter dayon na ngadto sa 45 puntos nga masaker.
- Latest
